INTIA sozietate publikoak urte amaieran Adierazpen Geografiko Babestuaren barruan ziurtatutako milioi bat kilo “Nafarroako Txistorra” gainditzea espero du. Gaur egun, dagoeneko bost enpresa eta lau harategi dira “Nafarroako Txistorra AGB” markarekin produktua ziurtatzen dutenak. Hain zuzen ere, INTIAk kudeatutako zigilu horrek 885.000 kilo txistorra baino gehiago ziurtatu ditu dagoeneko, eta kopuru hori nabarmen handituko da ziurtagiria lortzeko prozesuan dauden beste lau enpresa sartzen direnean.
Joan den asteburuan, Nafarroako Harakinen Elkarteak Txistorra Lehiaketa antolatu zuen aurten ere, eta 17. edizio honetan Uharteko Iriguibel harategiak irabazi zuen. Bigarren saria bigarren urtez jarraian Iruñeko Zuazu harategiari egokitu zitzaion, eta hirugarren saria Chuleteros Carnes Selectas S.L. enpresari. 43 harategik hartu zuten parte, iaz baino lau gehiagok. Gainera, INTIA-Reyno Gourmet-ek stand bat izan zuen, eta, horren bidez, Nafarroako enpresa egileen parte-hartzea sustatu zuen Adierazpen Geografiko Babestu berrian.
Atzoko jardunaldiak gogora ekarri zuen 2006. urtean enpresa elaboratzaile batzuek eta Nafarroako Harakinen Gremioak aukera bat ikusi zutela INTIArekin batera adierazpen geografiko babestu bat erregistratzeko (AGB), txistorrari Europaren aurrean ospea emateko. Zehatz-mehatz frogatu behar zen elikagaiak lotura sendoak zituela eskualdearekin, ezaugarri paregabeak ematen zizkiotela, prozesu burokratiko konplexu bat gainditu behar zela eta egokitu egin behar zela agente guztiek adostutako nahitaezko kalitate-estandar batzuk epe luzera betetzeko.
Prozesua 2019an hasi zen berriro, bederatzi enpresak eta gremioak Nafarroako Txistorra Ekoizleen Elkartea sortu zutenean produktuarentzako logotipo batekin, eta Europan erregistratu zuten. Ahalegin horrek mugarri garrantzitsuak lortu ditu dagoeneko. Adibidez, sektoreak txistorraren kalitate-estandarrei buruzko akordio bat lortu zuen AGBren oinarriak ezartzeko; 2022an bere marka kolektiboa aurkeztu zuen, Nafarroako Txistorra/Txistorra de Navarra; eta joan den abuztuan babes nazional iragankorra lortu zuen AGB gisa, Nekazaritza, Arrantza eta Elikadura Ministerioak emana (MAPA).
