Reyno Gourmetek beste urte batez bat egin du Ados Pilotaren San Fermin Torneoarekin babesle gisa, Nafarroako nortasuna, kalitatea eta lurraldearekiko konpromisoa balioan jartzen dituzten ekimenekin duen konpromisoa berretsiz.
Aurtengo edizioaren aurkezpena Iruñeko Kondestablearen Jauregian egin da, emakumezkoen pilota profesionalaren egutegian sendotuta dagoen txapelketaren xehetasun guztiak ezagutzera emanez. Ohikoa denez, izaera solidarioa izango du, eta 2026 honetan Nafarroako Esklerosi Anizkoitzaren Elkartearen alde jokatuko da.
Aurkezpenean parte hartu dute Maider Belokik, Iruñeko Udaleko zinegotziak; Rakel Anjolek, Iruñeko Peñen Federazioko presidenteak; Maite Ruiz de Larramendik, Ados Pilotaren ordezkari gisa; Silvia Lorea Loperenak, Nafarroako Esklerosi Anizkoitzaren Elkartearen izenean; eta Maite Gabilondok, Reyno Gourmeten ordezkari gisa.
Bere hitzartzean, Maite Gabilondok azpimarratu du Reyno Gourmetentzat garrantzitsua dela beste urte batez halako txapelketa bati babesa ematea, lurraldearekiko lotura, kalitatea eta gizarte-konpromisoa bezalako balioak partekatzen baititu. Era berean, Ados Pilotak emakume pilotarien alde egiten duen lana nabarmendu du.
Txapelketak bi modalitate izango ditu: lau eta erdikoa eta binakakoa. Banakakoan Maddi Barrocal, Ane Mendiburu, Leyre Oskoz eta Natale Aranburu ariko dira, ligaxka sisteman, eta finala uztailaren 5ean jokatuko da Iruñeko Labriten.
Binakako txapelketa, berriz, playoff sistemaren bidez jokatuko da, eta finala uztailaren 10ean izango da Labrit pilotalekuan. Partidak hainbat herritan jokatuko dira, hala nola Urroz-Villan, Ubiden, Segovian, Eulaten, Lesakan eta Iruñean, emakumezkoen pilota profesionala ohiko esparruetatik harago eramanez. Azpimarratzekoa da Segoviako hitzordua, bertan jokatuko baita Ados Pilotaren lehen partida ofiziala.
Aurtengo edizioak izaera solidario berezia izango du berriz ere, eta bildutako dirua Nafarroako Esklerosi Anizkoitzaren Elkartearentzat izango da. Helburuen artean exoeskeleto berri bat erostea dago. Elkarteak eskerrak eman ditu ekimen honen bidez gaixotasunaren errealitatea gizarteratzeko ematen den aukeragatik.
Reyno Gourmeten eta Iruñeko Udalaren babesari esker, Ados Pilotak emakumezkoen pilota profesionaleko erreferentziazko lehiaketak sustatzen jarraitzen du, San Fermin bezalako testuinguru berezi batean kirola, gizartea eta konpromisoa uztartuz.
